ALAR mbetet pranë miqve të saj

Share

Pandemia nuk është vetëm një urgjencë e shëndetit publik, por ajo pati pasoja nga më të ndryshmet në të gjitha lëmitë e jetës shoqërore, ekonomike dhe kulturore. Në këtë kontekst, masat që autoritetet morrën për parandalimin dhe luftën kundër përhapjes së infeksionit me koronavirusin e ri, pavarësisht nga forma ligjore që kanë, kanë çuar, në mënyrë të pashmangshme, në anulimin ose, të paktën, në rishikimin e veprimtarive të planifikuara nga Shoqata Lidhja e Shqiptarëve të Rumanisë. Fatmirësisht, ekipi i shoqatës u riorganizua me shpejtësi dhe iu përshtat realitetit të ri, saqë kemi arritur të sigurojmë një komunikim të pandërprerë me ju, me anëtarët e shoqatës, me simpatizantët dhe miqtë e ALAR-it. Revistat  Drita dhe Albanica kanë vazhduar të dalin me ritmin e zakonshëm, ndërkohë që site-i www.alar.ro si dhe faqja zyrtare në Facebook kanë vazhduar të japin informacione të  aktualizuara. Gjithashtu, Qendra Kulturore Shqiptare ka vazhduar me projektet e botimit dhe, në një kohë të shkurtër, do të njoftojmë botimet e reja të Shtëpisë Botuese Asdreni.

Megjithë përçapjet tona, mbetet keqardhja se nuk mund të takohemi me ju, ashtu siç ishim mësuar dhe siç do të dëshironim. Të paktën, për një periudhë kohe, promovimet e librave dhe të revistave, takimet me personalitete të komunitetit dhe të jetës publike, si dhe minikoncertet me muzikë shqiptare do të bëhen online, në site-in tonë në Facebook dhe në kanalin tonë në YouTube. Duke aksesuar këto faqe, tashmë mund të gëzoheni me albumin Muzică veche albaneză (Muzikë e vjetër shqiptare), prodhim i grupit Serenada të ALAR-it, i cili është pritur kaq mirë nga publiku. Kemi menduar që t’i bëjmë më të larmishme llojet e prodhimeve audio-video, duke përfshirë këtu, përveç evenimenteve që tashmë i kemi njoftuar, edhe ekspozita virtuale apo klipe dokumentare. Në këtë mënyrë, ju adresoj ftesën për të mbetur pranë nesh edhe nëpërmjet mjeteve elektronike, sepse ekipi i shoqatës ALAR do të vazhdojë të prodhojë me standartet cilësore, të njohura tashmë, duke pasur ndihmën e bashkëpunëtorëve dhe partenerëve të saj.

Gjithashtu, përmes anulimit të panaireve të librit, kemi humbur lidhjen direkte me lexuesit tanë në gjithë vendin dhe është kufizuar, ndonjëherë, mundësia e të interesuarve për të shtuar në bibliotekat e tyre botimet tona më të reja. Për të shmangur këtë situatë, kemi një zgjidhje të përkohshme: në faqen tonë www.alar.ro ekziston një seksion kushtuar prezantimit të librave, revistave, albumeve audio, të publikuara nga shoqata ALAR. Duhet vetëm të na dërgoni një e-mail për materialet që ju interesojnë dhe ekipi ynë ju siguron se këto do të mbërrijnë tek ju falas. Sigurisht, presim me dëshirë edhe kërkesat e atyre që ende nuk dinë shumë për Shqipërinë dhe për shqiptarët.

Këto janë disa nga masat me të cilat përpiqemi të mbetemi pranë miqve tanë, por edhe të promovojmë kulturën e komunitetit tonë në hapësirën publike. Sigurisht, jemi të hapur për ide, sugjerime dhe propozime të reja, ndaj ju drejtoj, me këtë rast, ftesën për të na kontaktuar. Shpresojmë të gjithë se, në një të ardhme të afërt, do të mund të rinisim eventet kulturore të mëdha, pranë jush dhe pranë miqve nga Shqipëria dhe diaspora shqiptare.

Deputet Bogdan-Alin Stoica

Series Navigation<< ALAR rămâne alături de prietenii săiDoli numri 6 i revistës Albanica >>